Првиот вицепремиер и министер за политички систем и односи меѓу заедниците, Артан Груби денеска оствари проштална средба со амбасадорот на Грција, Димитрис Јанакакис со кого разговараа за актуелните теми во земјата и регионот, како и за проектите преку кои соработката меѓу двете земји дополнително ќе се продлабочува.
За време на овој состанок, Груби и Јанакакис разговараа и за спроведувањето на Преспанскиот договор, во кој случај беше договорено двете земји да ги почитуваат обврските што произлегуваат од овој договор.
Двајцата соговорници се согласија дека Договорот од Преспа треба да се земе како добар пример за надминување на различните спорови во регионот и светот.
Грчкиот амбасадор Јанакакис му порача на првиот вицепремиер Груби дека Република Северна Македонија може да смета на грчката поддршка во процесот на спроведување на сите потребни реформи со цел земјата да стане членка на Европската Унија.
Првиот вицепремиер Груби и грчкиот амбасадор Јанакакис разменија мислења и за изградбата на линијата за интерконекција на природен гас меѓу Грција и Северна Македонија, проект што ќе ја зголеми конкурентноста и безбедноста на снабдувањето со природен гас на нашата земја, но исто така ќе ја подобри конкурентноста на економијата воопшто низ целиот регион, каде што Северна Македонија ќе стане енергетски центар на Балканот, преку кој другите соседни земји би се снабдувале со гас.
Груби и Јанакакис на крајот од оваа проштална средба се согласија дека двете земји треба да продолжат да одржуваат добри односи и да се ангажираат со цел унапредувањето на соработката во сите области, особено во областа на економијата, што е во интерес на сите. граѓани во обете земји.
