Верски водач во Иран предизвика голема бура реакции со неговата изјава дека вакцините против коронавирусот ги прават луѓето хомосексуалци, што Министерството за здравство остро го осуди.
– Кој ќе се вакцинира против корона, ќе стане хомосексуалец, изјави Абас Табризијан, кој во Иран е познат како „татко на исламската медицина”.
Во последно време, Табризијан е познат како теоретичар на заговор, јавија светските медиуми.
– Избегнувајте ги оние кои биле вакцинирани против Ковид-19. Тие станаа хомосексуалци, рече Табризијан преку својата група на Телеграм, која ја следат околу 210.000 луѓе, пренесува „Џерусалим пост”.
Иранското Министерство за здравство остро реагираше на оваа изјава.
– Тоа не е само суеверен и глупав став, туку и незаконско мешање во здравствените и политичките работи на земјата, рече портпаролот Кјанус Јаханпур, најавувајќи правните последици.
Ова не е првпат Табризијан да ја критикува западната медицина.
Тој е убеден дека многу болести можат да се излечат со молитва и без лекари и лекови.
