Речиси 1,6 милиони дози вакцини против Ковид-19, кои се на залиха во Авганистан, треба да се искористат што е можно поскоро, бидејќи нивниот рок истекува, објави Светската здравствена организација (СЗО).
Процесот на тестирање и вакцинација против Ковид-19 е значително прекинат од почетокот на август, кога Талибанците дојдоа на власт по повлекувањето на меѓународните трупи предводени од САД, пренесуваат агенциите.
Со сите тешкотии на теренот, СЗО вели дека работи со партнери во најмалку 16 авганистански провинции за да го зголеми тестирањето и вакцинацијата против Ковид-19.
Во Авганистан, меѓу другото, СЗО има за цел да вакцинира најмалку 20 проценти од приближно 32 милиони жители.
Во средата, СЗО објави дека испратила медицински пакети во две болници во Кабул и провинциските канцеларии на организацијата, доволно за да се задоволат потребите на 50.000 луѓе.
Претходно, организацијата соопшти дека авганистанскиот здравствен систем е пред колапс доколку не се преземат итни мерки.
Според СЗО, девет од 37 болници за Ковид веќе се затворени во септември, а илјадници здравствени работници низ целата земја со месеци работат без плата.
