Градоначалникот и локалната самоуправа се врската помеѓу централната власт и стопанството, им порача потпретседателот на СДСМ и заменик на претседателот на Владата задолжен за економски прашања, Фатмир Битиќи вечерва на битолските стопанственици, потенцирајќи дека од идните градоначалници очекува активна соработка со стопанствениците, а нив ги охрабри преку редовна комуникација да бидат активни чинители во барањето на решенија за сите отворени прашања.
Битиќи рече од Христо Кондовски, кандидатот на СДСМ и коалициските партнери за градоначалник на Општина Битола, очекува да остане близок со стопанствениците.
„Очекувам дека духот на еден докажан претприемач ќе го пренесе во локалната власт, затоа што сметам дека локалната власт како и централната, треба да биде во сервис на граѓаните и сервис на стопанството. Односно од идниот градоначалник Кондовски побарав да биде близок до стопанството и кога ќе стане градоначалник, како што бил додека бил дел од стопанството, затоа што заеднички навистина можеме многу да направиме.”-рече Битиќи.
Покрај актуелните мерки, тој додаде дека е отворен и за нови предлози од стопанствениците за потребната поддршка на компаниите. „На битолските стопанственици им кажав дека и во овие моменти во кои што се соочуваме со една глобална нова најверојатно енергетска криза, ќе ги изнајдеме сите начини заеднички да го пребродиме овој период. Веќе како централна власт креираме мерки со кои што ќе интервенираме во енергетскиот сектор, а секако после 17-ти кога очекуваме нашиот кандидат за градоначалник во Општина Битола да стане градоначалник, заедно со локалната власт да направиме нови реални мерки кои што ќе значат не само стимулирање, туку и заедничко настапување на локалната власт, централната власт и стопанството за доброто на нашето општество.”-истакна Битиќи.
На барањето на стопанствениците општината поефикасно да издава дозволи за градба, Кондовски рече дека се обврзува сите закончени барања во Општина Битола да бидат решени во рок од 90 дена од новата локална самоуправа. „Дали одговорот ќе биде позитивен или негативен ќе одредат позитивните законски прописи, но важно е граѓаните да добијат информација дека нивното барање е вака или така решено. Ќе го ослободиме тој економски потенцијал кај позитивните одобренија да може да се работи во Битола.”-рече Кондовски.
Додаде дека ослободувањето на општинскиот потенцијал, промената на ГУП и ДУП ќе допринесат да се отвори бизнисот.
„Ќе се стимулира слободната економска зона, каде со олеснувања ќе се привлечат нови инвеститори.”-рече Кондовски.
