Американска делегација ќе се сретне со високи талибански претставници во Доха викендов, на прва средба откако Вашингтон ги повлече своите војници од Авганистан, изјавија двајца официјални лица од Вашингтон.
Тие рекоа дека американската делегација на високо ниво ќе биде составена од службеници на Стејт департментот, УСАИД и американската разузнавачка заедница и дека треба да извршат притисок врз талибанците да обезбедат продолжен безбеден излез на американски државјани и други од Авганистан и да биде ослободен киднапиран американски државјанин Марк Фрерикс.
Друг приоритет ќе биде талибанците да не дозволат Авганистан повторно да стане центар на Ал Каеда или други екстремисти, истовремено притискајќи ги да го подобрат пристапот до хуманитарна помош, бидејќи земјата се соочува со сериозна економска криза што не може да се спречи, изјавија американските официјални лица.
Специјалниот пратеник на САД, Залмај Калилзад, кој со години го водеше дијалогот со талибанците и беше клучна фигура во мировните преговори, нема да биде дел од американската делегација, а талибанците ќе бидат претставени од членовите на нивната нова влада.
„Овој состанок не е за признавање или давање легитимитет на талибанците. Остануваме јасно дека легитимитетот на нивната влада мора да се добие само преку акција. Мора да постигнат трајни резултати”, нагласи американскиот претставник.
