Јавен обвинител од Основното јавно обвинителство Радовиш заедно со увидна екипа, кримтехничар од Министерството за внатрешни работи и инспектори за труд и безбедност при работа извршија увид во рудникот Бучим, работна единица Флотација, каде денеска околу пладне загинаа двајца лпинисти, а уште едно лице било повредено.
Како што информираа од Македонската алпинистичка федерација, во несреќата настрадаа алпинистот Зоран Мајсторски, кој беше еден од столбовите на македонскиот алпинизам и Драган Станишков од Радовиш.
Според првичните сознанија, стои во соопштението од Службата за односи со јавноста при Јавно обвинителство на Република Северна Македонија, до несреќата дошло при чистење на два силоси, високи по 25 метри, со дијаметар од 17 метри, во кој се складира руда. Починатите, биле ангажирани со договор помеѓу две правни лица за специфична услуга за чистење на силосите полни со руда.
– Во текот на увидот, по дадени насоки и наредби од обвинителството, извршено е фотографирање на самото место на настанот. Обезбедени се затекнатите траги и предмети. Идентификувани се и извршен е разговор со лицата присутни на местото на настанот. Обвинителството издаде наредби за обезбедување на техничката документација за силосите, целокупната документација за ангажманот на алпинистичкиот клуб „Плоча”, правилниците за работа на работната единица Флотација. Издадена е и наредба за вршење на обдукција на телата на починатите, се наведува во соопштението.
Забрането е работењето на тој дел од рудникот и ќе биде обезбедуван од полициски службеници, за да по дадена наредба од обвинителството утре (14 октомври 2021) се продолжи со вршење на увид на самото место со присуство на техничка инспекција со рударски инженери.
Основното јавно обвинителство Радовиш презема и други дејствија за откривање на причините за несреќата.
