По стапките на трофејниот италјански фудбаклски стратег Антонио Конте кој одби понуда да го преземе Њукасл кој преку ноќ стана најбогат клуб, тргна и актуелниот тренер на англискиот премиерлигаш Лестер, Брендан Роџерс. Њукасл кој доби нови сопственици, Саудискиот инвестициски фонд кој е под контрола на принцот Мохамед бин Салман, и има план да стане водечки клуб, сепак не поминува лесно во потрагата да почне со реализација на проектот со ангажирањето на квалитетни и звучни имиња.
Роџерс иако добил богата понуда да седне на клупата кај Њукасл, истата ја одбил бидејќи имал поинакви идеи. Роџерс е главен фаворит во 2023 година да го наследи Пеп Гвардиола на клупата на Манчестер сити. Наводно тој има ветување од челниците на Сити дека ќе биде назначен за нов менаџер на „граѓаните“ кога ќе се повлече Гвардиола. Ова не е прв пат името на Роџерс да се поврзува со клупата на Сити. Пред осум години беше кандидат да го наследи Роберто Манчини, но тогаш челниците на клубот одлучија за Мануел Пелегрини. Сега планот на челниците на Манчестер сити е по Гвардиола да дојде тренер кој добро го познава англискиот фудбал и е докажан во Премиер лигата, а Брендан Роџерс е еден од нив.
