Претседателот на СДСМ Зоран Заев денес беше во Охрид каде даде изјава за медиуми, во изјавата тој рече:
Се наоѓаме на неколку денови пред вториот круг од Охрид од Балканскиот Ерусалим ја праќаме пораката дека развојот на овој убав македонски град мора да продолжи. А тој ќе продолжи само ако сите се обединиме околу политиките што гарантираат напредок, економски раст, но истовремено и заштита на ова преубаво светско природно и културно наследство.
Исходот од овие избори го одредуваат правецот по кој ќе се движи општина Охрид и неговите граѓани. Дали тоа ќе биде редот, правдата и вложувањето во граѓаните и економскиот развој или неправдата, уништувањето на градот и Езерото и трошењето на парите во криминални тендери.
Како централна власт во овие четири години бележиме важни економски успеси и тоа е потврдено со бројни статистички податоци и параметри.
За само четири години сите плати се во просек зголемени за над 6.000 денари Невработеноста ја намаливме на 15.9 отсто, за 300 отсто ја зголемивме социјалната помош, обештетивме 13.000 стечајни работници и воведовме социјална државна пензија.
Преку државната помош за надминување на последиците од пандемијата, одвоивме 10 милиони евра за помош на хотелиерите преку мерката Ваучер за туризам, покрај минатата година, се спроведе и оваа година.
Грижата за заштитата на Охридското езеро ја покажавме и преку зачувување на статусот на УНЕСКО, но и преку преземање на Колекторскиот систем во кој вложивме над четири милиони евра.
Сето ова ја потврдува нашата намера да вложуваме во граѓаните, во општините, во сето она шт е важно за да се подобри квалитетот на живот во секое населно место.
Затоа, ги повикувам сите граѓани, да се обединиме и на 31 октомври да гласаме да продолжи грижата за граѓаните, да продолжи заштитата на животната средина, да продолжи локалниот економски развој и парите да се враќаат назад кај граѓаните.
Да гласаме да продолжи развојот на Охрид, да гласаме за број 12 и Константин Георгиевски.
