САД, Норвешка, Велика Б ританија и ЕУ денеска ја предупредија суданската армија дека нема да го поддржат новиот премиер доколку тој не биде поддржан од широк круг граѓани. Во соопштението на таканаречената „Тројка” и земјите од ЕУ се споменува и заканата за одбивање на економската помош за Судан.
– Потребни се кредибилна влада и парламент за да се обнови економската помош, се наведува во соопштението. „Тројката” и ЕУ нагласија дека ќе работат на забрзување на напорите да ги повикаат на одговорност оние што го попречуваат демократскиот процес доколку не се постигне напредок.
– Народот на Судан зборуваше гласно и јасно како и во 2019 година, тие го отфрлаат авторитарното владеење и сакаат транзицијата кон демократија да продолжи, се вели во соопштението, додавајќи дека суданските лидери сега мора да покажат дека слушаат.
САД, Норвешка, Велика Британија и ЕУ го повикаа Судан да избере ново цивилно раководство и да работи на време и процес за преостанатите транзициски задачи, вклучително и основите за избори и законодавните и судските органи на власта.
Според нив, „едностраната акција за назначување нов премиер и влада би го загрозила кредибилитетот на тие институции и ризикува да ја турне нацијата во конфликт”.
Тие, исто така, нагласија дека ќе продолжат да ги сметаат воените власти одговорни за кршење на човековите права и очекуваат безбедносните служби и другите вооружени групи да се воздржат од насилство врз мирните демонстранти и цивили.
Портпаролот на американскиот Стејт департмент Нед Прајс истакна дека мора да постои цивилна транзиција во Судан.
