Манчестер јунајтед одигра нов, разочарувачки меч, но со голот на Маркус Рашфорд во 93-та минута дојде до големи три бода против Вест Хем.
Домашниот состав беше поконретен, упати повеќе удари и ја имаше топката во своите нозе, но дури длабоко во судиското продолжение дојде до посакуваните три бода. Се играше 93 минута кога се отвори простор за домаќините по што по комбинацијата на Роналдо, Марсијал и Кавани топката дојде до Рашфорд кој ја смести во мрежата на „чеканите“ за ерупција на „Олд Трафорд“.
Победничкиот гол на Англичанецот предизвика многу дебати на социјалните мрежи, бидејќи на истиот му претходеше сомнителна ситуација. Ентони Марсијал претходно го проигра Единсон Кавани, кој се чини е во недозволена ситуација, ако се суди според фотографиите.
Со овој триумф Јунајтед го мина Вест Хем и сега со 38 бода е на 4. позиција на табелата.
Њукасл пак дојде до првото славје во 2022 година, односно само втор триумф во актуелнава кампања во која целта е да се обезбеди опстанок. Избраниците на Хау го добија Лидс на негов терен со 1-0 со голот на Шелви во 75 минута.
