Мехмедовиќ: Не се работи за манипулација на бројките од страна на претходната комисија, туку за начинот на кој се интерпретираат бројките во јавноста

Откако во денешното гостување на Утрински брифинг  д-р Злате Мехмедовиќ рече дека имало манипулација со бројките на починати и дека новиот состав на Комисијата за заразни болести ќе ги преразгледа сите досегашни извештаи, неговата изјава предизвика бура во јавноста. Д-р Мехмедовиќ не прецизираше на каква манипулација со бројки мислел. Поради тоа, тој се огласи на Фејсбук.

Би сакал да појаснам, пред се поради големиот интерес на новинарите што точно значи “манипулацијата” со бројките. Не се работи за манипулација на бројките од страна на претходната комисија за заразни болести, туку за начинот на кој се интерпретираат бројките во јавноста, Долго време се разговараше на темата дека во ковид евиденцијата се водат и починатите од друга болест или несреќен случај кај кои е посмртно докажан присуство на коронавирусот, а тоа може да биде и причина за големата смртност, и тоа е нешто за што ќе се отвори дискусија на КЗБ. Комисијата за заразни болести водела точна евиденција согласно препораките на СЗО за смртноста и не станува збор за манипулации на тие бројки, туку за манипулациите и дезинформациите во јавноста поврзани со смртноста за која основната причина е ковид. Зборот манипулација беше погрешно употребен и требаше да биде дообјаснет, на Комисијата за заразни болести и се извинувам за недоразбирањето, напиша д-р Мехмедовиќ.