Пит Дејвидсон се откажа од краткото возење во вселената со ракетата на милијардерот Џеф Безос.
„Ѕвездата од ‘Сатрдеј најт лајф’ повеќе не е во можност да го реализира летот, кој беше одложен речиси една недела,“ соопшти компанијата на Безос за вселенски патувања во четвртокот навечер.
Не беа дадени други детали.
Компанијата објави претходно оваа недела дека Дејвидсон ќе биде еден од шесте патници на следниот лет на „Блу ориџин“. Летот беше закажан за следната среда, но сега е префрлен на 29 март поради дополнителни тестирања, соопшти компанијата.
Дејвидсон би бил третата славна личност која се качила на автоматизираната капсула Blue Origin за 10-минутен лет од Западен Тексас. Актерот Вилијам Шатнер и поранешниот НФЛ великан и ко-домаќин на „Добро утро, Америка“, Мајкл Страхан, полетаа минатата година. Безос беше на првиот лет на својата компанија, заедно со неколку патници, минатиот јули.
Компанијата соопшти дека во наредните денови ќе ја објави замената на Дејвидсон за да им се придружи на петте патници кои плаќаат за летот. Дејвидсон требаше да оди како гостин на Безос.
Компанијата не ја откри цената на билетот за клиентите кои плаќаат за ваква незаборавна авантура.
