Светскиот тенис има нова „ѕвезда“ откако младиот шпански тенисер, Карлос Алкараз по вчерашната победа над Рафаел Надал, денеска му го зема „скалпот“ и на првиот рекет во светот, Новак Ѓоковиќ на АТП мастерс 1000 турнирот во Мадрид.
Алкараз во маратонски натпревар кој траеше повеќе од три и пол часа славеше над Србинот со 2-1, по сетови (6-7, 7-5 и 7-6).
Првиот сет во полуфиналето се одлучуваше во тај-брејк. Претходно домашниот миленик прв стигна до брејк, на што големиот шампион одговори и обезбеди завршен гем во кој ја искористи четвртата сет-топка.
Следуваше израмнето надигрување во вториот сет до резултат 6-5 во корист на 19-годишникот. Ѓоковиќ одигра слаб сервис гем и дозволи сетот да му побегне, а мечот да замине во одлучувачки трет сет.
Драматично и израмнето беше и во последниот сет. Двајцата тенисери не попуштаа на свој сервис, Алкараз во 10. гем не реализира меч-топка, па одново решаваше тај-брејкот. Младиот Шпанец прв зададе удар во завршницата и одзеде поен на сервис на противникот и си го отвори патото кон нова историска победа.
Неверојатен натпревар ни понудија двајцата тенисери, а од него можевме да научиме многу работи, но две и тоа како се важни. Првата е дека Алкараз е веќе опасност и дефинитивно во иднина ќе биде еден од најдобрите тенисери во светот, а втората е дека Новак Ѓоковиќ и тоа како е подготвен за напад на титулата во Ролан Гарос и дека се досега беше само подлога за турнирот во Париз.
Вториот полуфиналист ќе го даде дуелот меѓу Гркот, Стефанос Циципас и Германецот, Александер Зверев.
