Карло Анчелоти стана првиот тренер во историјата на фудбалот кој што има четири освоени титули како тренер во Лигата на шампионите. Италијанскиот стратег покажа дека сè уште не е за фрлање откако го водеше Реал до ново искачување на европскиот трон.
-Тоа беше неверојатна сезона, не постои начин да се опише. Јас сум секогаш оптимист, но не ни сонував дека во една сезона ќе ги освојам шпанскиот Суперкуп, Ла Лига и Лигата на шампионите. Што да кажам, јас сум човек создаден за рекорди. Имавме неверојатна сезона која што знаевме како да ја крунисаме во финалето. Успеавме да победиме и да поминеме екстремно тешки натпревари и сметам дека заслужено дојдовме до титулата, изјави Анчелоти.
Италијанецот во Реал дојде откако минатата сезона го раскина договорот со Евертон, додека во својата кариера четирите тренерски трофеи ги освои со Милан и Реал Мадрид.
