Сојузот на синдикатите на Македонија денеска пред Собранието ќе постави столчиња во знак на поддршка на Комисијата за финансирање и буџет за да го изгласаат амандманот со кој се бараат средства во ребалансот на буџетот за линеарна исплата на 2.806 денари во нето-износ за вработените во јавниот сектор, најави во интервјуто за „Макфакс“, претседателот на ССМ, Дарко Димовски.
„На тие осум пратеници што минатиот пат не го изгласаа амандманот ќе им ставиме жолт картон симболично за да им кажеме дека ги опоменуваме: Размислете дека тоа што го правите е против македонскиот работник. Ќе ги ставиме и нивните имиња и презимиња и доколку не биде изгласан, ќе ги читаме со имиња и презимиња и ќе бараме да си дадат оставка бидејќи не се достојни да го преставуваат македонскиот народ во ова време-невреме“, вели претседателот на ССМ.
На прашањето дали се оправдани барањата на јавниот сектор во услови на глобална криза, Димовски појаснува: На оваа инфлација и на овие шокови ние во ССМ се прашуваме дали ова од денеска е доволно, а не да биде преку леб погача. Ова е барање за егзистенција и е во вистински момент, но се прашуваме дали ќе го покрие и ќе го амортизира ова што се случува“.
Апелира дека државата треба да се свести за анархијата во јавниот сектор.
„Зошто го премолчуваме моментот кога знаеме дека речиси 4.000 работници не одат на работа. Знаеме дека уште толку партиски работници вработени сега или во минатото не одат на работа. Се прави анархија во јавниот сектор, самиот работодавец го ствара тоа. Да се свестиме и да кажеме стоп на партиските вработувања“, потенцира Димовски во интервјуто за „Макфакс“.
За односот со власта, дали е човек на Заев или на Мицкоски, за несогласувањата меѓу гранските синдикати, за следните чекори на ССМ – во интервјуто за „Макфакс“ одговара првиот синдикалец Дарко Димовски.
