По повод прославата за Денот на независноста на САД, американскиот претседател Џо Бајден истакна дека основните слободи се загрозени, па ги повика граѓаните на обединување и „принципиелен патриотизам” кога земјата се соочува со економски предизвици и национални поделби.
„Од најдлабоките длабочини на нашите најлоши кризи, секогаш сме се издигнувале до повисоки височини. Сме биле тестирани и претходно, токму како што сме на тест и денес, но, никогаш не потфрливме, затоа што никогаш не отстапивме од основните уверувања и ветувања, што ја одредуваат оваа нација”, се наведува во изјавата на Бајден во соопштението од Белата куќа.
Како што тој додава, американската економија расте, но, не и без потешкотии. Слободите биле загрозени, како во земјата, така и во странство.
Тој повика на единство и покрај актуелните поделби во американската заедница. Бајден ја повика нацијата да се „посвети на принципиелниот патриотизам”.
Денот на независноста – 4 јули, годинава е одбележан во сенка на пресудите на Врховниот суд за абортусот и за вооружувањето, како и на порастот на вооруженото насилство и на масовните пукотници во Чикаго, но и на претресот во врска со улогата на поранешниот претседател Доналд Трамп во немирите во Конгресот на 6 јануари и големата инфлација.
