Граѓани со развиорени македонски знамиња и со маички на кои е напишано „НЕ”, како и „Навиваме за Македонија”, се дел од учесниците на протестот против францускиот предлог што вечерва почна пред Владата.
На булеварот „Илинден” се уште стои паролата „Но пасаран” испишана со црвени букви, а група млади луѓе со тапани го скандираат името „Македонија”. Може да се забележат и транспаренти „Сепак ние ќе победиме” и „Стоп за бугаризација”, но главниот и најголем е „Со фашисти не преговараме”.
Според најавите, предвидено е обраќање на претседателот на ВМРО-ДПМНЕ Христијан Мицкоски, веднаш по почетокот на протестниот марш.
Протестот против францускиот предлог, под мотото „Ултиматум – НЕ благодарам”, се одржува седми ден. Учесниците од Владата ќе се упатат кон Министерство за правда каде се очекува да ги искажат своите пораки, а потоа ќе продолжат пред Собранието.
Вчера, поради муслиманскиот празник Курбан Бајрам протест не се одржа, а не се организираше ниту во петокот кога незадоволството беше изразено преку блокади во Скопје, на булеварот пред Владата, како и на магистралните патишта Штип – Велес, Струмица – Радовиш и Плетвар – Прилеп.
Иницијативата „Ултиматум – НЕ благодарам” денеска преку соопштение до медиумите повика на масовност и на мирно и достоинствено протестирање.
