На ракометното игралиште крај женска плажа во Струга кое го носи името „Горан Попоски Бабец“, од денеска до 20 август ќе се одржи 50. јубилеен Меѓународен турнир со пет домашни и три екипи од странство.
Осумте екипи учесници на јубилејното издание се поделени во две групи.
Во Групата А ќе играат: Еурофарм Пелистер, домаќинот Струга, грчки АЕК и словачки Татран Прешов. Во Групата Б, покрај бранителот на трофејот скопски Вардар, се македонските прволигаши Бутел и Алкалоид, како и словенечки Целје. Од годинашните учесници, дури пет екипи го освојувале струшкиот трофеј: Вардар, Еурофарм Пелистер, Струга, Целје Пивоварна Лашко и АЕК Атина.
На првиот ден од турнирот ќе се играат натпреварите: Струга – Еурофарм Пелистер (17 часот) Вардар – Алкалоид (19 часот) Бутел – Целје (21.30 часот).
Свеченото отворање е закажано за 20.40 часот.
