Сопругата на Силвестер Сталоне, Џенифер Флавин, поднесе барање за развод по 25 години брак, објави „Пејџ сикс“ во средата.
Поранешната манекенка (54) ги доставила документите за раскид на бракот со ѕвездата на „Роки“ (76) во округот Палм Бич, Флорида, на 19 август.
Во судските документи се наведува дека бракот е „неповратно прекинат“ и дека Флавин бара имотот акумулиран за време на заедницата да биде правично распределен меѓу нив.
Флавин, исто така, тврди дека нејзиниот сопруг „намерно ги растурил, исцрпил и/или трошел заедничките финансии“, што негативно влијаело на брачниот имот. Таа бара да биде искомпензирана со тоа што ќе добие повеќе пари отколку што добива Сталоне од имотот.
Флавин, која сака да го врати своето моминско презиме, исто така сака ексклузивно користење на нивниот брачен дом во Палм Бич, Флорида, додека Сталоне живее во нивниот имот во Калифорнија.
Во изјава за „Пејџ сикс“ и „Пипл“, Сталоне рече: „Го сакам моето семејство. Ние пријателски ги решаваме личните прашања“.
Кратко по поднесувањето на барањето на Флавин, актерот се најде на насловните страници на таблоидите откако ја покри тетоважата на своето рамо со ликот на сопругата и врз него истетовира куче.
Старата тетоважа ја замени со нова, ликот на кучето од филмовите „Роки“.
Уметникот за тетоважи Зак Перез го покажа покривањето во објава на Инстаграм истиот ден кога Флавин ги поднесе документите до судот.
„Најдобриот ден во мојата кариера со тетоважи!!“ напиша Перез покрај фотографијата. „Ти благодарам што ми довери да ја направам твојата тетоважа денес @officialslystallone“.
Парот се венча во 1997 година.
Имаат три ќерки: Софија (25), Систин (24) и Скарлет (20).
Сталоне претходно беше во брак со Саша Чак од 1974 до 1985 година и Бригит Нилсен од 1985 до 1987 година.
