Напаѓачот на Фулам, Александар Митровиќ веќе некое време игра во одлична форма, па несомнено е дека многу големи фудбалски тимови би го сакале во своите редови. Тој сезонаа во Премиер лигата веќе постигна девет гола, па само Хари Кејн заедно со Ерлинг Халанд е поефикасен од него.
Митровиќ веќе изјави дека имал покана да се пресели во Рома, но можеби би можел да остане во Англија бидејќи навивачите на славниот Манчестер Јунајтед навистина го посакуваат.
На еден од навивачките портали на „црвените ѓаволи“ беше објавен интересен текст во кој се наведува дека Ерик тен Хаг треба да тргне по Александар Митровиќ. Во текстот на Том Ејвери на порталот „Манчестер Јунајтед во фокус“ аналитички се наведува дека холандскиот стручњак веќе знаел да „обликува“ габаритни напаѓачи како Себастиен Алер во Ајакс, со порака дека и Митровиќ во тој случај ќе процвета на „Олд Трафорд“.
– Доведувањето нов напаѓач ќе биде на врвот на листата на приоритети на Тен Хаг за претстојното лето. Второто поглавје на Роналдо во Јунајтед е при крај, Марсијал има проблеми да остане во форма, па опциите за напад се многу ограничени – се наведува во текстот.
Се наведува и дека цената на српскиот центарфор сигурно ќе „скокне“ по Мундијалот во Катар, особено ако се земе во предвид неговиот нереален старт на сезоната во највисокото англиско првенство.
– Митровиќ ги поседува сите квалитети кои Тен Хаг ги бара кај напаѓачот. Физички, тој е неверојатен, кошмар за бранителите. Може да ги вовлече сите соиграчи во игра како сидро и централна точка на нападот – додава авторот понатаму и потсетува дека Јунајтед сигурно ќе има корист од нафрлувањата, бидејќи Митровиќ докажа дека е неверојатен во играта со глава, што Тен Хаг ќе може сам да се увери кога ќе патува во „Крејвен Котиџ“ на 13 ноември.
