Рома одигра 1:1 на гостувањето кај Сасуоло, со што тимот на Жозе Мурињо освои бод на првата средба по незгодниот пораз во градското дерби со Лацио.
Португалецот во свој стил го опишал натпреварот, а на драматичен начин посочил дека еден негов фудбалер ги изневерил соиграчите.
– Вечерва видовме тим кој сака да победи против квалитетен противник. Штета што напорите на екипата беа упропастени од однесувањето на еден фудбалер кој не се однесуваше професионално. Тоа не значи дека се работи за играч кој направил грешка, јас не го критикував ниту Ибањез по дуелот со Лацио бидејќи грешките се составен дел на фудбалот.
Нема да ви кажам за кој фудбалер станува збор, имав 16 фудбалери на теренот вечерва и од настапот на 15 сум задоволен. Во јануари ќе мора да си најде нов клуб, изјавил Мурињо.
Италијанските медиуми се уште не почнале да шпекулираат за кого станува збор, но се очекува наскоро да се дознае кој од фудбалерите на Рома ќе мора да почне да се пакува и да си замине во зимскиот преоден рок.
