Организацијата на Светското првенство во фудбал во 2022 година во Катар беше проследена со контроверзии за човековите права, прашања за ограничувањата наметнати на навивачите, но натпреварите поминаа без инциденти и со одлична организација.
Откако на британската телевизија беше споменато дека за време на организацијата на Мундијалот загинале од 400 до 500 луѓе, организаторите беа принудени да го наведат бројот на печалбарите кои загинале при изградбата на стадионот. Тие наведоа дека од 2014 до 2020 година, 414 работници загинале во работни несреќи во Катар.
За работниците поврзани со организацијата, пријавени се три смртни случаи поврзани со работа и 37 смртни случаи кои не се поврзани со работата. Сепак, кружеа различни приказни со различен број на жртви.
Претставниците на Меѓународната организација на трудот, со кои разговараше АФП, сметаат дека на таа тема „нема веродостојни информации“.
На почетокот на Мундијалот навивачите беа загрижени и поради строгата регулатива за консумирање алкохол во Катар. Друга грижа е поврзана со хомосексуалноста, која се смета за нелегална во таа земја.
Така, на навивачите не им беше дозволено да влегуваат на стадионите облечени во облека во боја на виножито, што е симбол на ЛГБТ заедницата, но некои европски функционери сепак ги носеа тие бои.
Осум европски фудбалски федерации ги спречија своите играчи да носат ленти „One Love“ за поддршка на ЛГБТ заедницата, бидејќи ФИФА се закани со казни. За време на воведниот натпревар на првенството, Италијанец излезе на теренот со знаме од виножито на натпреварот Португалија – Уругвај.
По натпреварот Иран – САД имаше и помали инциденти меѓу провладините и антивладините ирански навивачи.
Катар како домаќин во четирите недели од Светското првенство очекуваше околу еден милион луѓе. Во првите две недели имаше 765.859 посетители, додека неколку десетици илјади подоцна дојдоа за полуфинале и финале. Засега, конечната бројка се уште не е позната.
Навивачите беа загрижени за цените за сместување кои за многумина беа превисоки. Оние кои се одлучија за најевтината опција од 80 евра од ноќ за двокреветна соба останаа задоволни. Протестираа оние кои платија 200 евра за сместување под шатори.
Првото Светско првенство во арапскиот свет го означи зближувањето меѓу Катар и Саудиска Арабија по дипломатското замрзнување од 2017 до 2021 година.
Светското првенство го зближи арапскиот свет во поддршка на Палестинците со знамиња и транспаренти на стадионите. Знамињата на еден натпревар ги носеа и марокански играчи.
Европски политички фигури, вклучително и францускиот претседател Емануел Макрон, го посетија Катар.
Кон крајот на натпреварувањето, Катар повторно е во центарот на вниманието поради корупцискиот скандал во Европскиот парламент. Катарските власти негираа каква било вмешаност.
