Милан и Сампдорија забележаа победи во првите натпревари одиграно во 2023 година, во Серија А. На отворањето на 16.коло, двата тима триумфираа на гостински терен.
Милан победата ја обезбеди со два гола во 10. и 15.минута. Тонали најпрвин му асистираше на Леа, а потоа и самиот постигна гол. Салернитана внесе неизвесност во овој меч во 83.минута, кога Татарушану беше совладан од Бонацоли.
За Салернитана дебитираше голманот Очоа. Имаше одлично деби, прими два гола, но одбрани осум удари.
Сампдорија по два и пол месеци успеа да победи. Втората победа од почетокот на сезоната, играчите на Сампдорија ја забележаа на теренот на Сасуоло.
Слично како и Милан и Сампдорија во краток интервал постигна два гола. Во 25. и 28.минута стрелци беа ветеранот Габијадини и Аџуело.
Сасуоло заигра многу подобро во вториот дел, но само успеа да го намали поразот со голот на Берарди од пенал во 64. минута.
