Златниот глобус“ за најдобра машка улога заврши во рацете на Остин Батлер за неговата изведба во „Елвис“, додека наградата за најдобра женска улога ја освои Кејт Бланшет за глумата во „Тар“.
Батлер беше прогласен за најдобар актер во филмска драма – биографија за легендата на рок музиката Елвис Присли – на синоќешната свечена церемонија.
„Јас сум во оваа просторија со сите мои херои. Не можам да поверувам дека сум тука”, рече Батлер во својот говор, а особено ги истакна Бред Пит и Квентин Тарантино.
Остин (31) ја започна својата кариера со детски улоги. Глумеше во тинејџерската серија „Судбоносна замена“, потоа во филмовите „Беше еднаш во Холивуд“, „Дневниците на Кери“. Го портретира Џејмс Гарет во ТВ-серијата „Зои 101“, која се емитуваше од 2005 до 2008 година.
Во јули 2019 година, се појави веста дека Остин добил улога како Елвис Присли во биографскиот филм на Баз Лурман. Говорејќи за улогата на Присли, Остин изјави за „Холивуд репортер“: „Кога го почнавме, сакав гласот да ми биде ист. Бев исплашен. Една година пред да почнеме да снимаме, работев на гласот. Гледав колку што можев повеќе од неговите изведби и филмови, одново и одново. Чувствувам голема одговорност кон Елвис, неговата поранешна сопруга Присила и ќерката Лиза Мари и сите луѓе ширум светот кои го сакаат.“
„Фабелманови“ се закити со „Златен глобус“ за најдобар филм, а Стивен Спилберг ја освои и статуетката за најдобра режија. Спилберг, чиј филм има многу автобиографски елементи, во својот говор му се заблагодари на семејството. „Секој ме смета за успешна приказна. Но, никој не знае вистински кои сме сѐ додека не станеме доовлно храбри за да раскажеме кои сме“, рече Спилберг.
Светските медиуми, иако посветија прилично големо внимание на Батлер, истакнуваат дека холивудската легенда Спилберг е големиот победник на овогодишната церемонија.
Доделувањеот на „Златен глобус“ секоја година го означува почетокот на сезоната на наградување во филмската индустрија. Наградата ја доделува Здружението на странски новинари во Холивуд (ХФПА).
