Првата точка на дневниот ред на идниот германски министер за одбрана ќе биде дали да испорача напредни борбени тенкови на Украина, изјави денеска германскиот министер за економија Роберт Хабек.
„Кога ќе биде назначен нов министер за одбрана, тоа ќе биде првото прашање за кое треба да се одлучи конкретно“, изјави Хабек за германското национално радио „Дојчландфунк“ на маргините на Светскиот економски форум во Давос, пренесува Ројтерс.
Германската министерка за одбрана Кристин Ламбрехт поднесе оставка во понеделникот, бидејќи владата во Берлин е под зголемен притисок да дозволи распоредување борбени тенкови во Украина.
Германската влада се соочува со обновени повици да испрати тенкови „Леопард 2“, кои Украина ги смета за клучни ако сака да ја победи Русија или барем да одобри нивна испорака од други земји, како што е Полска.
Варшава е јасна за својата намера да снабдува борбени тенкови, но бара дозвола од Германија како земја на производство.
Германскиот канцелар Олаф Шолц во понеделникот изјави дека брзо ќе дејствува за да гјазамени Ламбрехт, а „Франкфуртер алгемајне цајтунг“, повикувајќи се на владини извори, објави дека нејзиниот наследник ќе биде именуван денеска.
