Македонскиот ракометен шампион Вардар 1961 ја забележа првата победа во новата сезона во регионалната СЕХА лига, откако вечерва во Скопје го совлада белградски Партизан со 31-26 во рамки на 2. коло во групата Б.
По стартниот пораз на гостински терен од словачки Татран, ракометарите на Вардар влегоа мотивирано во дуелот со српскиот претставник и на полувреме имаа водство од 16-14.
Гостинскиот состав во продолжението на два пати го израмнуваше резултатот (19-19, 21-21), но тогаш Вардар врати со серија од четири голови и на крајот заслужено ги освои првите бодови во новата сезона во СЕХА лигата.
Вардар до победата дојде на крилјата на македонските репрезентативци Дејан Манасков и Филип Талевски кои постигнаа по 9 гола, а седум гола запиша и Стојанче Стоилов. Одличен беше и засилувањето Јагуриновски кој заврши со два гола, но изнуди и пет удари од седум метри, како и голманот Томовски кој беше одличен со 11 одбрани.
Кај Партизан се издвои Зечевиќ со 7 гола, а Иван Мичиќ имаше пет од пет на крајот. Голманот на црно-белите Андреј Трнавац мечот го заврши со 14 одбрани.
Вардар во 3. коло ќе му биде домаќин на Татран, на 10. Овој месец во салата „Јане Сандански“ со почеток во 18 часот.
