Тренерот на Далас Џејсон Кид изјави дека тимот може да се бори за титулата во НБА со доаѓањето на Кајри Ирвинг.
По договорот меѓу двата клуба кој беше потврден вечерва, Ирвинг, заедно со Маркиф Морис, се пресели во Далас во замена за Доријан Фини-Смит, Спенсер Динвиди и неколку пикови од првата и втората рунда на драфтовите 2027 и 2029 година.
„Мислиме дека неговиот талент и неговата способност ќе нè направат подобри. Неговото доаѓање ќе нè стави во позиција да ја освоиме титулата. Кога ќе ги погледнете неговите резултати со другите тимови, тој победуваше“, рече Кид, пренесе Би-Би-Си.
Ирвинг освои титула со Кливленд во 2016 година и е осумкратен Ол-стар. Во последните три и пол години во Бруклин имаше проблеми со повреди, суспензии и неиграње поради одбивањето да се вакцинира против коронавирусот.
На почетокот на минатата недела тој побара трејд бидејќи не успеа да се договори со раководството на Нетс за продолжување на соработката.
„Лесно е да се гледаат сите разговори за негативата, но ајде да ги погледнеме позитивните страни од она што го направи на теренот и надвор од него. Така и пристапуваме. Тој е за кошарка. Тој сака да победува и сака да го тренираат. Ова е голема можност за мене да имам некој таков да помогне“, изјави Кид.
Тој рече дека спојувањето на Ирвинг со Лука Дончиќ, кој моментално е надвор од терените поради повреда на петицата, може да направи разлика во тимот кој е петти во Западната конференција со 29-26.
Ирвинг се очекува да му се приклучи на тимот денеска во Лос Анџелес и би можел да дебитира против Клиперс во среда навечер.
