Албанската Глада го прогласи понеделник, 13 февруари, за ден на национална жалост за жртвите од катастрофалниот земјотрес во Турција и Сирија.
Веста на социјалните мрежи ја објави премиерот Еди Рама.
– Тринаести февруари ќе биде ден на национална жалост во Албанија, како знак на болка и молитва за жртвите од големата трагедија од земјотресот на турско-сириската граница, како и во знак на солидарност со нашиот пријател Турција, која застана покрај нашата земја кога го доживеавме катастрофалниот земјотрес на 26 ноември 2019, стои во објавата.
Знамињата пред државните институции ќе бидат спуштени на половина копје.
– Спуштањето на државното знаме на половина копје и палењето свеќа од страна на секој човек, по желба и можност, ќе бидат значајни знаци на понеделникот обележан со човечка болка и народна солидарност што ги надминува нашите граници, напиша Рама.
Во настраданите подрачја Албанија веднаш испрати спасувачки и медицински тимови.
