Седум лица се уапсени во Бугарија откако вчера во близина на Софија биле пронајдени 18 задушени мигранти во напуштен камион во кој се движеле од границата со Турција до границата со Србија.
Меѓу уапсените е и шефот на бандата шверцери, кој претходно беше осуден на условна казна од пет месеци затвор за трговија со луѓе, изјави друг државен функционер.
Истрагата утврдила дека камионот нелегално превезувал 52 лица скриени под дрва, главно мигранти од Авганистан кои дошле од Турција. Мигрантите, чии тела биле откриени недалеку од Софија, најверојатно загинале поради недостаток на воздух во товарниот дел на камионот.
Заменик главниот обвинител Борислав Сафаров изјави дека неколку мигранти се задушиле.
„Неколку патници во камионот се задушиле. Пронајдовме 18 тела и 34 преживеани Авганистанци“, изјави Сафаров.
Дел од нив се приведени во полиција поради претходни кривични дела, изјави директорот на полицијата Атанас Илков.
„Постои основано сомнение дека некои лица учествувале во криумчарење луѓе“, додаде Илков.
Потрагата по куќи и станови во Бугарија ќе продолжи и денеска. Полицијата и истражителите ќе се обидат да утврдат кој управувал со камионот кога биле пронајдени мигрантите, бидејќи возачот избегал од возилото.
Од болницата Пирогов во Софија известија дека ноќта поминала мирно за повредените мигранти, кои биле сместени во тој објект.
