Кривичниот суд, во повторената постапка, го ослободи од обвинение Љубе Бошкоски за предметот „Кампања“ откога тој веќе одлежа пет години затвор во „Идризово“. Бошкоски се гонеше дека земал пари за партиска кампања од странски државјанин кој во процесот беше и еден од клучните сведоци и се сослушуваше како загрозен сведок под псевдоним З1. Во повторениот судски процес тој не сведочеше, а судијката Илиевска-Јосиповиќ рече дека судот се обидел да го повика да сведочи во два наврати но не го добил.
Бошкоски беше уапсен по изборите во 2011 година за, како што тогаш се тврдеше, нелегално финансирање на кампањата беше осуден на седум години затвор, а со намалување на казната, одлежа пет години во Идризово.
Тој беше уапсен веднаш по изборите на 6 јуни 2011 година, пред ресторанот „Воденица“ во Скопје под сомнение за нелегално финансирање на изборната кампања. При извршениот претрес кај него беа пронајдени 100.000 евра и пиштол.
На интернет каналот „Ју Тјуб“ се појавија видео снимки, од кои јасно се гледа дека Љубе Бошковски нелегално зел пари, за нелегално финансирање на својата кампања за изборите во 2011 година.Снимките јасно покажуваат дека поранешниот македонски министер и посредникот договараат давање на 70.000 евра за Бошкоски, а посредникот му дава во еден момент 10.000 евра.
Овој предмет беше вратен на повторно судење по барање на Бошкоски откако во 2020 година Европскиот суд за човекови права во Стразбур пресуди дека му биле прекршени правата на фер судење во однос на повикување и испитување на сведоци.
-Ова го доживувам како победа на правдата. Моментално ќе се повлечам од политиката поради приватни причини. Се надевам дека можам уште да придонесам за мојата Македонија сега кога знам дека немам никаков багаж зад мене со мојата партија – изјави тој по пресудата.
