Обилни врнежи во југоисточна Турција им предизвикуваат проблеми на луѓето погодени од земјотресот. Во Искендерун, во провинцијата Хатај, дождот ги поплави шаторите, објави денеска новинската агенција ДХА.
Опозицискиот политичар Канан Кафтанчиоглу на Твитер сподели видео на кое се гледа жена како плаче и се обидува да извади вода од шаторот.
Кафтанчиоглу рече дека луѓето сè уште не биле ставени во бродските контејнери, како што беше ветено, повеќе од еден месец по земјотресот.
Во земјотресот на турско-сириската граница пред пет недели само во Турција загинаа повеќе од 48.000 луѓе. Стотици илјади луѓе останаа без покрив над главата и живеат во шатори.
Претседателот Реџеп Таип Ердоган, исто така, вети дека ќе ги обнови куќите во регионот погоден од земјотресот во рок од една година. Во Турција во моментов има изборна кампања, граѓаните на 14 мај ќе избираат нов парламент и претседател.
