Комуналните работници во Париз денеска го прекинуваат повеќенеделен штрајк, кој, меѓу другото, доведе до илјадници тони натрупано ѓубре на улиците.
Екипи за чистење се распоредени да го собираат отпадот што се насобрал на улиците за време на протестот организиран против пензиската реформа.
Францускиот синдикат CGT објави дека тринеделниот штрајк е завршен. Се проценува дека до денеска на улиците на Париз се собрале 10.000 тони ѓубре, што, како што е наведено, е точно колку вкупната тежина на Ајфеловата кула.
За време на вчерашните протести низ Франција, десетици демонстранти беа уапсени и повторно избувнаа немири, иако значително помалку луѓе излегоа на улиците.
За синдикатите, борбата против законот е далеку од завршена. Единаесеттиот ден од одржувањето на протестите е закажан за 6 април.
