Во првиот квартал од 2023 година извозот од индустриските зони достигна 951,6 милиони евра што е највисоко ниво досега во последниве пет години. Анализата на ТИРЗ покажува дека тоа е пораст од речиси 12 проценти во однос на истиот период лани и над 22 отсто во однос на 2021 година. Во однос на првиот квартал од 2020 извозната активност на компаниите е зголемена за дури 59 проценти, во однос на 2019 за 37 отсто, односно за 72 проценти во однос на 2018, информираат од дирекција за ТИРЗ.
На месечно ниво вкупниот извоз од зоните во март достигна 345 милиони евра, што е за 31 процент повисоко споредено со март 2022.
– И во однос на увозот е регистрирано највисоко ниво досега во однос на споредбата по квартали во изминативе пет години. Така увозот во првиот квартал од годинава достигна 770 милиони евра и е за 3,5 проценти повисок од првиот квартал лани, и речиси 5 отсто повисок споредено со првиот квартал во 2021 година. Дури 40 проценти е порастот на увозот во однос на 2020, додека споредно со првиот квартал 2019 година увозот пораснал за 21 отсто, односно 57 проценти однос на 2018. Во зоните во март месечниот увоз во ТИРЗ е на ниво од 279 милиони што е за 17 отсто повеќе во однос на март лани. Анализата покажува дека во третиот месец од годинава е регистрирано и високо ниво на нето извозот од 23,4 проценти, информираат од ТИРЗ.
Анализата, стои во соопштението од ТИРЗ, покажува и дека продолжува растот на бројот на вработени кој во март достигна највисоко ниво досега. Во компаниите во ТИРЗ работат 16.650 наши сограѓани што е за речиси 15 проценти повеќе во однос на истиот период лани. Само со почетокот на годинава над 260 наши сограѓани се вработиле во компаниите во ТИРЗ.
– Се очекува трендот на раст да продолжи со оглед на тоа што ТИРЗ во последниве две години се постигнати договори во вкупен обем од над 620 милиони евра и истите треба да донесат над 5000 нови работни места, информирата од дирекција за ТИРЗ.
