Возачите на Формула 1 ја поддржаа денешната одлука на раководството на трката и локалните власти за откажување на Големата награда на Емилија Ромања поради големите поплави во северна Италија.
Одлуката за откажување е донесена поради црвениот метео аларм во Италија поради обилните врнежи од дожд, големите поплави и одрони и тешката состојба во регионот.
Формула 1 ја наведе желбата да се избегне понатамошен притисок врз локалните власти и службите за итни случаи, при што спасувањата се спроведуваат низ целиот регион.
Во регионот Емилио Ромања, околу 5.000 луѓе беа евакуирани од своите домови, а најмалку пет лица загинаа.
Трката требаше да се одржи во недела во 15 часот, а во петок и сабота ќе има слободни тренинзи и квалификации.
Седумкратниот светски шампион од Мерцедес, Луис Хамилтон изјави дека безбедноста е на прво место.
„Се надевам дека сите во Емилија Ромања се безбедни и се грижат еден за друг. Нашите мисли се со погодените од оваа трагедија и со неверојатните служби за итни случаи кои работат на терен. Сите разбираме дека безбедноста е на прво место. Едвај чекам да те видам сите на следната трка“, изјави Хамилтон на социјалните мрежи.
