Почина поранешниот италијански премиер Силвиот Берлускони (86). Беше лидер на политичката партија Форца Италија. Во изминатите четири денови беше хоспитализиран во Милано поради леукемија.
Тој беше на чело на партијата што беше официјално основана во јануари 1994 година, за првпат да учествува на општите избори во март истата година.
Берлускони беше премиер кратко време – седум месеци во 1994 година, пред повторно да биде назначен на истата позиција во 2001 година.
Втората влада на Берлускони е најдолгата во историјата на Италијанската Република. Но, на 20 април 2005 година тој понуди оставка на својата влада по поразот на регионалните избори и внатрешните проблеми во коалицијата. Потоа, на 23 април 2005 година, формираше нова влада без поголеми промени во нејзиниот состав.
На 12 ноември 2011 година Берлускони поднесе оставка до италијанскиот претседател Џорџо Наполитано, по губењето на парламентарното мнозинство и големата економска криза што ја зафати земјата.
Берлускони беше и сопственик и основач на медиумските компании кои многумина ги нарекуваат „италијанска медиумска империја“. Според магазинот Форбс, Силвио Берлускони бил најбогатиот човек во Италија со имот вреден 12 милијарди долари во 2005 година, а бил и 25-ти најбогат човек во светот.
Тој исто така беше претседател на фудбалскиот клуб Милан помеѓу 1986 и 2004 година. Берлускони ќе биде погребан со државни почести во катедралата во Милано в среда, соопштија црковните власти во Милано, цитирани од италијанската новинска агенција АНСА.
На погребот се очекува да присуствува и италијанскиот претседател Серџо Матарела.
Според изворите, посмртните останки на Берлускони денеска ќе бидат префрлени во неговата приватна резиденција – вилата Сан Мартино, во близина на градот Аркоре, недалеку од Милано. Утре ќе бидат положени во седиштето на медиумската империја на Берлускони Медиасет во Колоно Монзесе.
Италијанскиот бизнисмен и политичар Силвио Берлускони е роден во Милано на 29 септември 1936 година, а неговата биографија е полна со скандали, обвинувања за корупција, сексуални афери и контроверзни деловни потфати, пишуваат светските медиуми.
По дипломирањето на Универзитетот во Милано, Берлускони почнал како претприемач во средината на минатиот век, првин во 60-тите години во секторот за недвижности, пред да се сврти кон медиумскиот сектор, телевизиски и издавачки, во 80-тите години.
Тој влезе во политиката во 1994 година со основањето на тогаш движењето „Напред Италија“ („Форца Италија“).
До 1990 година тој имаше повеќе од 150 бизниси, вклучувајќи три телевизиски мрежи и најголемата издавачка куќа во Италија.
Тој беше премиер на Италија во 1994 година, во периодот 2001-2006 година, како и 2008-2011 година, што го прави повоен премиер на Италија со најдолг – деветгодишен мандат.
Соочен со конфликт на интереси и други обвинувања тој поднесе оставка во декември 1994 година. Подоцна беше осуден за измама и корупција, иако пресудите на крајот беа поништени. И покрај обвинувањата и критиките за неговата контрола врз голем дел од италијанските медиуми, тој остана лидер на партијата Напред Италија и повторно стана премиер во 2001 година.
Берлускони беше контролен акционер на „Медијасет“ и сопственик на италијанскиот фудбалски клуб „Милан“ од 1986 до 2017 година.
Презентирајќи ја својата биографија „Епската приказна за милијардерот, кој владееше со Италија“ на новинарот на „Газета“, тој рече дека нема намера да го напушти „Милан“ додека не донесе нови успеси на клубот и опиша колку му значи овој клуб.
„Веќе им кажав на децата дека кога ќе заминам, ако сакаат, може да продадат сè што ќе им оставам. Единствено да не продаваат две работи: мојата куќа во Аркоре и поголемиот дел од сопственоста на „Милан“, рече Берлускони.
На едно место во неговата биографија тој опишува колку детството му било поврзано со „Милан“.
„Вистинската важност на ‘Милан’ ме потсетува на моето детство, на татко ми. Разговаравме речиси секоја вечер кога ќе се вратеше од работа. Во тоа време клубот не беше голем, но јас се идентификував со некои од играчите и сонував за ‘Милан’. Кога ме замолија да го купам ‘Милан’, веднаш помислив на татко ми и решив да го купам клубот“, се вели во книгата за човекот во чија ера „Милан“ петпати ја освојуваше титулата во Лигата на шампионите и осумпати титулата во Серија А.
Во 2018 година „Форбс“ го рангира Берлускони како 190. најбогат човек во светот со нето-богатство од 8 милијарди американски долари. Девет години претходно, „Форбс“ го рангира на 12-тото место на листата со најмоќни луѓе во светот за неговата доминација во италијанската политика.
На изборите во 2006 година неговата коалиција беше поразена од блокот на левиот центар, предводен од Романо Проди. По оставката на Проди во 2008 година, Берлускони доби трет мандат како премиер. Сепак, низата лични скандали и нестабилната италијанска економија предизвикаа да избледи поддршката на Берлускони и тој поднесе оставка во ноември 2011 година.
Антонио Тајани, кој заедно со Берлускони ја основаа Напред Италија во 1993 година, своевремено изјави дека поранешниот премиер е лидер во сите сфери на животот.
„Берлускони е лидер како претприемач, лидер во фудбалот, како долгогодишен сопственик на ‘Милан’, еден од најважните политичари во историјата на Италија, кој напорно работеше во корист на трансатлантските односи“, рече Тајани.
Политичките достигнувања на поранешниот премиер беа засенети од безброј кривични пријави против него – иако единствената пресуда што не беше поништена во жалбата беше за даночна измама – и неговите озлогласени секс-забави, познати како „бунга бунгас“, на кои често се појавуваа помлади убавици, кои му служеа за неговиот имиџ и напредување во кариерата.
Берлускони е осуден на седум години затвор поради проституција со малолетници за време на организирани забави. Казната е укината во жалбена постапка. Така, пресудата дека платил за секс со малолетна Мароканка, позната како – Руби, крадец на срцето, била поништена, иако потоа се соочил со две обвиненија за поткуп на сведоци за да молчи.
Џовани Орсина, професор на Универзитетот „Луис“ во Рим, верувал дека тој човек никогаш не треба да се потцени.
Советниците на Берлускони наводно му рекле дека е целосно луд кога првпат станал ТВ-тајкун и повторно кога сакал да стане премиер, професорот Орсина вели:
„Тој е човек од кој можеш да го очекуваш невозможното“.
Берлускони зад себе остави пет деца од два брака.
