Агенциите за хуманитарна помош на ОН денеска изразија загриженост за обемот на тековната операција во градот Џенин на Западниот брег, каде што беа убиени десет Палестинци и рекоа дека има ограничувања за пристапот на медицинските тимови.
„Вознемирени сме од обемот на воздушните и копнените операции во Џенин на окупираниот Западен Брег и воздушните напади насочени кон густо населениот бегалски камп“, рече Ванеса Хугенин, портпаролка на хуманитарната канцеларија на ОН.
Таа истакна дека меѓу убиените има и три деца, без да наведе детали.
„Тимовите за помош беа спречени да влезат во бегалскиот камп, вклучително и да дојдат до тешко повредените лица“, рече портпаролот на СЗО, Кристијан Линдмајер, зборувајќи за ограничувањата наметнати од израелските сили.
Хуманитарните групи го повикаа Израел да гарантира хуманитарен пристап.
