Турскиот претседател Реџеп Таип Ердоган изјави дека Украина заслужува да се приклучи на НАТО и го повика Киев да започне мировни преговори со Москва.
„Нема сомнеж дека Украина го заслужува членството во НАТО“, рече Ердоган на прес-конференцијата по средбата со украинскиот претседател Володимир Зеленски, додавајќи дека двете страни треба да се вратат на мировните преговори.
Тој изјави дека во војната што трае веќе 500 дена, украинскиот народ го брани територијалниот интегритет и независност на својата земја, како и дека Турција направила најинтензивни напори да стави крај на конфликтот меѓу Русија и Украина преку преговори врз основа на меѓународното право.
„Би сакал повторно да го нагласам гледиштето што секогаш упорно го бранев, а тоа е дека праведен мир нема губитници. И покрај разликите во мислењата меѓу страните, нашата најискрена желба е што поскоро да се вратиме на потрагата по мирно решение“, рече Ердоган.
Тој најави дека рускиот претседател Владимир Путин ќе ја посети Турција во август.
„Путин ќе ја посети Турција следниот месец“, рече Ердоган, додавајќи дека со рускиот лидер разговарал за размена на затвореници.
По средбата со Ердоган, Зеленски најави дека Украина и Турција го делат истото гледиште дека никој нема право да им го наметнува на земјите во регионот на Црното Море она што не одговара на нивните интереси.
„Благодарен сум на Турција за нејзината континуирана поддршка за територијалниот интегритет и суверенитет на Украина“, изјави Зеленски за новинарите.
Според него, двајцата претседатели разговарале за ситуацијата на Крим, кој е под руска контрола.
„Во секој случај, ќе ја вратиме нашата легитимна власт над Крим и ќе ја вратиме безбедноста на полуостровот и правдата на сите луѓе на Крим. Особено на кримските Татари, кои сега, за жал, повторно се подложени на остра репресија и притисок од Русија“, рече Зеленски.
Зборувајќи за иницијативата за црноморско жито, тој истакна дека „За жал, Русија максимално го блокира движењето на бродови со храна долж коридорот на Црното Море. Русија се однесува како да го поседува целото Црно Море, како да е сопственик овде“.
Тој најави дека со Ердоган разговарал за неколку различни заеднички проекти на Украина и Турција кои можат да се реализираат со цел зајакнување на односите меѓу двете земји и нивните безбедносни и економски интереси.
„Ова се однесува на соработка во воено-индустрискиот комплекс, развој на технологија, производство на беспилотни летала и други стратешки индустрии“, прецизира Зеленски.
Зеленски во петокот пристигна во Турција за да разговара за билатералните односи, регионалните и меѓународните прашања, вклучително и најновите случувања во војната, како и за Црноморскиот договор за жито и за обезбедување мир и стабилност во регионот.
Тоа е негова прва официјална посета на Турција од почетокот на руско-украинската војна која започна во февруари 2022 година.
