Поради воведување на новите владини мерки за заштита од високите температури, Државниот инспекторат за труд врши зачестени контроли на терен, а од вкупно 164 надзори, кај 30 работодавци се изречени забрани за вршење работа, соопшти денеска Јованка Тернчевска, министерка за труд и социјална политика.
Од Влада информираа дека продолжуваат да важат мерките и препораките за заштита на граѓаните од високите температури. Овие мерки ќе бидат со времетраење од 9 дена, од 17 до 25 јули. Поради топлотниот бран што ја зафати земјава, Владата донесе одлука бремените жени и лицата над 60 години да бидат ослободени од работа, во установите за згрижување на децата да не се практикува физичка активност и да не се изнесуваат децата на отворено во периодот од 11 до 17 часот, а единиците на локалната самоуправа, Црвениот крст и Центрите за социјални работи, во регионите зафатени со топлотниот бран да пружаат помош на осамени, стари, изнемоштени лица и бездомници.
