Српскиот претседател, Александар Вучиќ, вечерва се сретна со генералниот секретар на НАТО, Јенс Столтенберг.
Вучиќ рече дека е многу загрижен за развојот на ситуацијата на северот на Косово и оваа посета е многу важна за Србија, повеќе од безбедносен отколку од политички аспект.
„Сметаме дека се’ што се случува на север се случува поради однесувањето на властите во Приштина, тие повредуваат и апсат Срби, а за ова нема истрага. Тоа е најголемата грижа на Србите кои живеат на северот на Косово“ рече Вучиќ и додаде: Досега имавме професионален однос со КФОР и силите на НАТО и се надевам дека ќе продолжиме да го правиме тоа и дека вашата мисија ќе биде остварена во согласност со резолуцијата 1244. Побарав од КФОР да ја осигура безбедноста на Србите.
Столтенберг изјави дека е важно да се намалат тензиите и ги повика двете страни да се воздржат од насилство.
Разговорот со Столтенберг го иницираше претседателот Вучиќ минатата недела за да му пренесе на првиот човек на НАТО што се случува во Косово.
Тој претходно изјави дека побарал средба со генералниот секретар на НАТО бидејќи во согласност со резолуцијата 1244, која е во согласност со Повелбата на Обединетите нации, НАТО сноси одговорност за безбедносната ситуација во Косово.
Во текот на денот во Брисел се водеа разговори на ниво на главните преговарачи, но тие завршија без директна средба меѓу делегациите на Белград и Приштина.
