САД тврдат дека руските сили поставиле морски мини во Црното Море и се подготвуваат за можни напади врз цивилни бродови. Да потсетиме, Москва неодамна се повлече од договорот со кој се дозволува безбедно извоз на жито и од претходното предупредување дека сите бродови што пловат кон Украина сега ќе се сметаат за потенцијални носители на воена опрема.
Портпаролот на Советот за национална безбедност на Белата куќа, Адам Хоџ, изјави за новинарите: „Нашите информации покажуваат дека Русија поставила дополнителни морски мини на приодите до украинските пристаништа. Ние веруваме дека ова е координиран напор да се оправдаат какви било напади врз цивилни бродови во Црното Море и да се обвини Украина за тие напади“.
Се проценува дека околу 60.000 тони жито биле уништени во воздушните напади врз украинските пристаништа во последните неколку дена.
