Руските сили синоќа четврта ноќ по ред го нападнаа украинскиот пристанишен град Одеса. Гувернерот на регионот на Одеса, Олех Кипер, ги објави деталите, велејќи дека Русите се префрлиле од пристанишната инфраструктура на земјоделски претпријатија.
„Русите ја нападнаа Одеса со крстосувачки ракети „Калибр“ од Црното Море. Обидувајќи се да ги заобиколат системите за противвоздушна одбрана, непријателот ги насочи ракетите на минимална висина, користејќи ги карактеристиките на теренот. По три последователни ноќи на моќен ракетен терор против пристанишната инфраструктура, тие се префрлија на земјоделски претпријатија во регионот“, објави тој на Телеграм.
„Две ракети ги погодија силосите на една од земјоделските компании. Избувна пожар и додека пожарникарите го гасеа огнот, беше издадено второ воздушно предупредување. Втората ракета ја погоди истата компанија, при што беше оштетена земјоделска и спасувачка опрема. Пожарот на површина од повеќе од 200 квадратни метри е изгаснат“, рече Кипер.
„Непријателот уништи 100 тони грашок и 20 тони јачмен. Двајца вработени во компанијата се повредени“, објави гувернерот на Одеса.
