Големите шумски пожари на Хаваите, разгорени од силните ветрови, стигнаа до објекти и ги принудија властите да ги евакуираат и затворат училиштата во неколку заедници.
Спасувачите од океанот извлекле десетина луѓе кои скокнале за да се спасат од чадот и пламените јазици, пишува „Гардијан“.
„Американската крајбрежна стража реагираше во областите каде што луѓето скокаа во океанот за да избегаат од огнот и чадот“, се вели во соопштението на округот Мауи. Крајбрежната стража на „Твитер“ објави дека екипажот спасил 12 лица од водата кај Лахаина.
Пожарникар кој го гаснеше шумскиот пожар во западен Мауи е пренесен во болница кога претрпел вдишување чад и е во стабилна состојба.
Округот Мауи, исто така, објави дека неколку патишта во Лахаина се затворени, предупредувајќи: „Не влегувајте во градот“.
Противпожарните екипи на Мауи се борат со пожарите концентрирани во две области: популарната туристичка дестинација Западен Мауи и планинската внатрешна област. Не е познато колку згради изгореле, изјави портпаролката на Мауи, Махина Мартин. Околу 13.000 домаќинства Мауи останаа без струја, објави Хаваи Електрик.
„Ова е дефинитивно еден од најпредизвикувачките денови за нашиот остров со повеќекратни пожари, повеќекратни евакуации во различни области. Тоа е апокалиптично“, рече Мартин.
Ветрови од 80 километри на час беа регистрирани во внатрешноста на Мауи, а еден пожар, за кој се веруваше дека е локализиран, повторно се разгоре неколку часа подоцна.
Во областа Кули во Мауи, најмалку два дома беа уништени во пожар што зафати околу 1.100 хектари. Околу 80 луѓе беа евакуирани од 40 домови.
