Македонската машка кошаркарска репрезентација вечерва против Израел во естонската престолнина Талин го почнува настапот на претквалификацискиот турнир за пласман на Олимписките игри 2024.
Натпреварот е закажан со почеток во 18. часот во Арената „Тондираба“ во која утре во истиот термин македонските кошаркари ќе играат против домаќинот Естонија.
По ден пауза, во вторник од 16. часот, „црвено-жолтите“ ќе играат против репрезентацијата на Чешка.
Македонските кошаркари во Талин ќе се обидат да се пласираат меѓу првите две позиции кои носат место во полуфиналната фаза, во која вкрстуваат со двете најдобри селекции од групата во Гљивице во која се Полска, БиХ, Унгарија и Португалија.
Пласман во квалификациите за ОИ 2024 во Париз ќе обезбеди само најдобрата од овие осум репрезентации, кои се дел од европската зона.
