Јапонскиот премиер Фумио Кишида изјави дека развојот на стратешката соработка со Соединетите Американски Држави и Јужна Кореја е неопходен и неизбежен во меѓународните односи.
Кишида учествуваше на трилатерален самит со американскиот претседател Џо Бајден и јужнокорејскиот претседател Јун Сук-јеол во Кемп Дејвид во Мериленд, САД.
Јапонскиот премиер на заедничката прес-конференција потсети дека Јапонија ќе обезбеди хуманитарна помош од два милиони долари за регионот погоден од шумски пожари во американската држава Хаваи.
Кишида, исто така, рече дека руско-украинската војна ги разниша „темелите на меѓународниот поредок“ и дека нуклеарните закани и обидите на Северна Кореја за насилно менување на статус кво во Источното и Јужното Кинеско Море продолжуваат.
Тој го опиша проширувањето на трилатералната стратешка соработка меѓу САД, Јапонија и Јужна Кореја како „неопходно и неизбежно“. Додаде дека Јапонија, Јужна Кореја и САД ќе ја подигнат одбранбената соработка на уште повисоко ниво.
Лидерите на САД, Јужна Кореја и Јапонија во заедничка декларација по самитот во Мериленд објавија дека се договориле за проширување на безбедносните и економските врски.
„Ние, лидерите на Јапонија, Јужна Кореја и САД, се собравме во Кемп Дејвид за да иницираме нова ера на трилатерални партнерства. Ова го правиме во единствен момент за нашите земји и граѓани, што е историски пресврт. Сето тоа го правиме во време кога сме изложени на тестовите на геополитичките ривалства, климатската криза, агресивната војна на Русија против Украина и нуклеарните провокации“, се вели во заедничката декларација, наречена „Духот на Кемп Дејвид“.
Средбата се одржа во време кога односите на трите земји со Кина и Северна Кореја се се позатегнати.
Во декларацијата, лидерите истакнаа и дека покрај продлабочувањето на безбедносното партнерство, ќе продолжат да се фокусираат на градење силна соработка на полето на економијата и технологијата.
