Србија годинава ќе има доволни количества пченица за домашни потреби, а солидна заработка очекуваат и извозниците. Со пченица беа засеани околу 700.000 хектари, исто како и претходните години, а жетвата беше приближно 3,2 милиони тони.
Од тие количини, околу 1,5 милиони тони се доволни за домашни потреби, околу 1,2 милиони се за извоз, а останатите се наменети за стоковите резерви на земјава, пренесува Бета.
Агроекономистот Милан Простран вели дека најмногу пченица се извезува во соседните земји, а планот е да стигне до потрошувачите во земјите од Блискиот и Далечниот Исток, пред се во Северна Африка.
„Нашите амбиции се да извеземе најмалку милион тони преку Дунав преку пристаништето Коштанај и да ги извеземе во некои далечни земји со претовар во големи прекуокеански бродови. Имаше преговори со Египет за извоз, па некои поблиски земји од Кина, но секако милион тони не се малку за Кина. Со оглед на тоа што ги закупиле пристаништата во Грција, може да има некаков аранжман, извозот во Кина е сосема реален за некои идни времиња“, изјави Простран.
Србија генерално не увезува семе од пченица бидејќи има два водечки институти за оваа житарка – едниот во Нови Сад, другиот помал во Крагуевац. Нивните стручњаци работат на зголемување на приносите кои сега во просек се меѓу 4,5 и пет тони по хектар, додека во развиените земји се од осум до 10 тони.
Доколку се постигнат тие приноси, обработливото земјиште во Србија посеано со пченица би се намалило на оптимални 400.000 хектари. „Пченицата останува наш многу важен производ. Во структурата на сите житни култури, оваа житарка сочинува повеќе од 40 проценти“, нагласи Простран.
Државата го субвенционира производството на пченица помагајќи им на земјоделците со намалени цени за семиња, гориво и ѓубрива. Да нема такви субвенции, многумина би се откажале од сеидбата на „лебното жито“ бидејќи трошоците за производство би биле за 50 до 100 отсто повисоки.
