Повеќекратниот македонски ракометен шампион, актуелен освојувач на Купот, скопски Вардар го победи првакот битолски Е. Пелистер (30:26) во воведниот натпревар од новата сезона, во мечот за титулата во Супер купот на Македонија и го осови трофејот по четврти пат.
Пелистер кој беше бранител на трофејот во Супер купот беше немоќен пред разиграниот Вардар кој покажа дека ќе биде достоен конкурентен во распределбата на трофеите во новата сезона.
Мечот се одигра во Струмица. Изобилуваше со резултатска изедначеност, ниту еден тим не успеа да се одлепи и да направи предност поголема од два разлика. Во првиот дел Пелистер неколкупати ја имаше таа предност од два гола, но по нивно водство од 8:6 Вардар направи серија од 3:0 и го сврте резултатот. Се играше гол за гол, на одморот се замина со нерешени 13:13.
Вториот дел почна со гол на Пелистер за водство, но Вардар брзо го сврте резултатот и постојано водеше со гол разлика, битолскиот тим изедначуваше. Во финишот од мечот црвено-црните успеаа да се одлепат и на крајот да слават дури и убедливо со 30:26.
Најефикасен во тимот на Вардар беше Срдановиќ со осум гола, Петриќ постигна седум, Томовски мечот го заврши со седум одбрани. Во составот на Пелистер Радивојевиќ постигна седум погодоци, Кисум шест, а Пешевски пет.
