Дождот продолжи да паѓа над централна Грција и денеска, а воени сили беа испратени да помогнат во справувањето со големите поплави во регионот на Тесалија, додека ситуацијата се смири долж брегот на Црното Море во соседна Бугарија.
Грчкиот премиер Киријакос Мицотакис нареди распоредување на воени сили, а неговата канцеларија објави дека планира да ја посети Тесалија во текот на викендот.
Службите за итни случаи го извлекле телото на четвртата жртва, земјоделец затрупан во остатоците предизвикани од поплавата, во централниот град Домокос. Беше повикана поморска бригада стационирана во близина на поплавеното пристаниште Волос, а беше формирана и кризна единица во Лариса, главниот град на Тесалија.
Спасувањето животи е приоритет, изјави во Атина владиниот портпарол, Павлос Маринакис. Волос е целосно отсечен и е без струја и вода, а флашираната вода во супермаркетите е при крај. Портпаролот на службите за итни случаи рече дека ниските области на Тесалија, каде живеат околу 700.000 луѓе, се целосно потопени, а во некои области има вода длабока до 2 метри.
Во изминатите 36 часа се примени околу 5.000 итни повици, рече портпаролот. Жителите на Кардица на западниот дел од регионот се качија на покривите, додека нивото на водата се искачи на дури 4 метри.
Главниот автопат, кој води северно од Атина до Солун, е блокиран на 200 километри. Обилните врнежи се очекува да престанат доцна вечерва, по што ќе започне санацијата на инфраструктурата. Сите што претрпеа штета ќе добијат помош, рече Маринакис.
Деталите за исчезнатите остануваат нецелосни бидејќи многу села се отсечени и луѓето не можат да ги полнат своите мобилни телефони.
