Рускиот претседател Владимир Путин и севернокорејскиот лидер Ким Џонг Ун денеска ги завршија петчасовните разговори на космодромот Восточни во рускиот регион Амур, кои според нив ги зајакнуваат врските на пријателството и добрососедството и дејствуваат во име на мирот, стабилноста и просперитетот во регион.
Ким на свечениот прием организиран во негова чест од Путин рече дека верува оти неговата посета на Русија се случува во време кога „се води жестока борба меѓу напредокот и реакционизмот, како и правдата и неправдата на меѓународната сцена“. пренесува ТАСС.
„Процесот на градење мултиполарен свет силно се развива благодарение на заедничката волја и обединетите сили на независните партии“, рече севернокорејскиот лидер кој по разговорите се качи на својот воз и го започна долгото патување до Пјонгјанг.
Ким рече дека со Путин разговарал и за ситуацијата на Корејскиот полуостров.
„Другарот Путин и јас штотуку детално разговаравме за воено-политичката ситуација на Корејскиот полуостров, но и во Европа“, рече тој, додавајќи дека ќе му помогне на рускиот лидер во неговата борба против империјализмот.
Путин изјави дека Москва ќе и помогне на Северна Кореја да изгради вселенски сателити и затоа Ким и тој денеска се на космодромот Восточни.
„Затоа дојдовме овде. „Лидерот на Северна Кореја покажува голем интерес за ракетната технологија, тие се обидуваат да развијат вселенска програма“, изјави Путин за новинарите.
Според неговите зборови, и сегашната посета се одвива во навистина пријателска атмосфера.
„Обемната агенда, програмата, вклучува посета не само на космодромот Восточни, туку и на други големи високотехнолошки кластери, индустриски претпријатија и иновативни центри на рускиот Далечен Исток“, рече претседателот.
Северна Кореја утринава лансираше две балистички ракети во морето како демонстрација на сила за време на отсуството на Ким од земјата.
