По повод одбележување на 100 години македонска авијација, на 16 септември 2023 година (сабота), со почеток во 11:00 часот, на спортскиот аеродром „Стенковец-Скопје“, свое обраќање ќе има претседателот на Владата на Република Северна Македонија, Димитар Ковачевски.
Во рамки на настанот на кој ќе присуствуваат владини претставници и гости од земјата и регионот, подготвена е богата програма во која ќе учествуваат над 30 различни воздухоплови од земјава и странство како и падобранци од нашата земја и од целиот регион.
Предвидено е акробатско летање со авиони, прелети во група и низок прелет на патнички авион. Падобранците ќе го развеат најголемото државно знаме досега, а едриличарите ќе изведат акробации кои се стандардни за аеромитинзи. Специјални гости на настанот ќе бидат воздушните сили на Србија, Италија и Грција кои ќе се претстават со свои изведби во македонскиот воздушен простор.
Свои обраќања на настанот ќе имаат и министерот за надворешни работи на Република Србија, Ивица Дачиќ, како и амбасадорот на Италија во Република Северна Македонија, Андреа Силвестри и претставници на Аероклубот Скопје.
На аеромитингот ќе биде изложена и „Илинденка“, првиот и единствен македонски воздухоплов дизајниран и произведен во фабриката „20 Maj“, од членови на Аероклубот Скопје.
