Министерот за внатрешни работи Оливер Спасовски, кој престојува во работна посета на Албанија, денеска во Тирана, се сретна со македонски истакнати личности кои работат во Албанија.
– Со задоволство остварив средба со македонски истакнати личности од Република Северна Македонија кои работат и делуваат во Албанија, а заедно со Амбасадата на Република Северна Македонија во Република Албанија, објави министерот Спасовски на Фејсбук.
Оценува дека Северна Македонија и Албанија имаат заедничка европска иднина и заеднички го европеизираат регионот.
– Нашите пријателски односи ги пресликуваме во политичката, безбедносната, културната, економската соработка, со фокус на инфраструктурно поврзување, како и олеснување и забрзување на постапките кои се во надлежност на МВР, а секако и креирање на можности за иновации, раст и развој на бизнисите, културна и трговска размена – сѐ она што подразбира подобрување на општествено-економскиот живот во двете држави, на нашите сонародници Македонци во Албанија, а согласно нашиот воспоставен концепт „Го слушаме гласот на секој еден”, наведува тој.
Покрај другите на средбата присуствивала и претставничката на македонското малцинство во албанскиот владин комитет за малцинства, Марјана Костофски.
– Големо задоволство изразувам кон министерот Спасовски за средбата, на која го информирав за мојата активност во Комитетот, како и финансиски поддржаните проекти, како што тоа беше неодамна испечатениот и промовиран фотоалбумот „Народни носии на македонското малцинство во Република Албанија“ на авторот Никола Ѓурѓај, кој е значаен документ за вековното постоење на Македонците на овие простори. Моите напори се насочени за поддршка и на други проекти и активности во интерес на нас Македонците, рече Костофски за МИА.
Додаде дека вакви средби со високи претставници на матичната земја се повеќе од добредојдени и потребни.
